Молитва к Божией Матери. (Молитва всех матерей имеющих детей).

О Пресвятая и преблагословенная Дево Богородице, Мати сладчайшего Господа нашего Иисуса Христа, Царице небесе и земли, всемилостивая заступнице рода христианского, прибежище и спасение притекающих к Тебе! Припадаю и покланяюся Тебе пред святою иконою Твоею и смиренно молю Тя: спаси и сохрани под кровом Твоим чад моих (имена), огради их от глада, губительства, труса, потопа, огня, меча, нашествия иноплеменных, междоусобныя брани, от всех враг видимых и невидимых, от всякия беды, болезни, напасти и внезапные смерти. О Царице небесная, на всякое время буди ми стена необоротимая и заступление крепкое. Яко Свет невечерний от чрева Твоего возсиявшая, озари души их, Пречистая, и отжени всякую мглу от сердец их.

Даруй им умиление, смирение, покаяние, чистоту помышлений и дух сокрушения. Покрый ризою пренепорочнаго Материнства Твоего, воспитай, уцеломудри, отверзи ум к восприятию всякого полезнаго учения, соблюди во страсе Божием и к послушанию родителем настави. Буди им непрестанная теплая молитвенница и ходатаица к родшемуся от Тебе Господу и Богк нашему Иисусу Христу, умоли его, да дарует им вся полезныя ко спасению их. Много бо может Матерняя Твоя молитва на умоление Владыки; сего ради твоим ходатайством и заступлением избави их от мытарств воздушных князей века сего, и на страшнем судище Христове сподоби их стати одесную Сына Твоего, и наследники вечных благ сотвори.

О всеблагая! Под Твою милость прибегаю, Богородице Дево, вручаю чад моих (имена) Твоим святым молитвам и Матернему смотрению Твоему, яко Ты еси, едина чистая и благословенная, Божественный покров рабом Твоим, да величаем Тя, всеблагомощная Госпоже Богородительнице, и славим воплощшагося от Тебе Христа Бога нашего, Емуже подобает всякая слава, честь и поклонение со безначальным Его Отцем и с Пресвятым и благим и животворящим Его Духом, ныне и присно и во веки веков. Аминь